Yasəmən Mehbalıyeva beynəlxalq elmi konfransda məruzə ilə çıxış edib

ADPU-nun nəzdində Azərbaycan Dövlət Pedaqoji Kollecinin Xarici dillər fənn birləşməsi müəllimi Yasəmən Mehbalıyeva Vətən müharibəsindəki qələbənin 5 illiyinə həsr olunmuş Beynəlxalq elmi tədqiqat konfransında (06–08 noyabr) məruzə ilə çıxış etdiyi üçün sertifikatla təltif olunub. Onun “İşğaldan azad edilmiş ərazilərə böyük qayıdış” adlı məqaləsi konfransın materiallarında dərc edilib.

Konstitusiya və Suverenlik İli – kitab sərgisi

ADPU-nun nəzdində Azərbaycan Dövlət Pedaqoji Kollecinin Yasamal tədris binasının kitabxanasında “Konstitusiya və Suverenlik İli” çərçivəsində kitab sərgisi təşkil edilib.

Tələbələr sərgi üçün hazırlanan guşə ilə tanış olublar. Baş kitabxanaçı Səhla Hüseynova tədbirin məqsədi barədə məlumat verərək bildirib ki, bu il Ulu Öndər Heydər Əliyevin rəhbərliyi ilə 1995-ci ildə qəbul olunmuş Azərbaycan Respublikasının Konstitusiyasının 30 illiyi tamam olur. Həmçinin 2020-ci ildə Vətən müharibəsi zamanı Ali Baş Komandan İlham Əliyevin rəhbərliyi ilə ölkəmizin ərazi bütövlüyü bərpa edilib və bu il həm də həmin Zəfərin 5 illiyidir.

Ş. Hüseynova qeyd edib ki, bu əlamətdar tarixlərin mahiyyətini və əhəmiyyətini bilmək hər bir Azərbaycan gənci üçün vacibdir.

Sabunçu korpusunda tələbələr arasında kross qaçışı keçirilib

ADPU-nun nəzdində Azərbaycan Dövlət Pedaqoji Kollecinin Sabunçu korpusunda tələbələr arasında kross qaçışı keçirilib. Yarışda İncəsənət və fiziki tərbiyə şöbəsinin qrupları iştirak ediblər. Start fitini idman rəhbəri Şahəddin Nərimanov verib.

Tələbələr Şamlıq meşə parkı istiqamətindən enişli-yoxuşlu marşrut üzrə qaçaraq finişə — ADPK-nın həyətinə çatıblar. Ümumi məsafə 1500 metr olub. Finişdə idman müəllimi Rüfət Nəsibov qaçış iştirakçılarını qarşılayıb.

Yarışın nəticələri:

1-ci yer – Kənan Sadiqov (FTM24/01) – 6 dəq. 25 san

2-ci yer – Valif Əzizov (FTM24/02) – 6 dəq. 51 san

3-cü yer – Ramiz Nəhmədov (FTM23/01) – 7 dəq. 16 san

4-cü yer – Ramal Quluzadə (FTM25/03) – 7 dəq. 36 san

Təbrik edir və yarışın bütün iştirakçılarına uğurlar arzulayırıq!

Milli Dirçəliş Gününə Həsr Olunmuş Futzal Turniri Keçirildi

ADPU-nun nəzdində Azərbaycan Dövlət Pedaqoji Kollecində idman rəhbəri Ş.Nərimanov və hərbi rəhbər R.Quliyevin təşkilatçılığı ilə kollecin tələbələri arasında 17 Noyabr – Milli Dirçəliş Gününə həsr olunmuş futzal yarışı keçirilib.
Yarış yüksək idman ruhu, gərgin mübarizə və komandaların peşəkar çıxışı ilə yadda qalıb. Nəticələrə əsasən qaliblər aşağıdakı kimi müəyyən olunub:
1-ci yer – “Qalatasaray” komandası
2-ci yer – “Köhnələr” komandası
3-cü yer – “Arsenal” komandası
Qalib komandaları təbrik edir, gələcək yarışlarda yeni uğurlar arzulayırıq.

Göyçə Aşıq Sənətinin Yaşadılması ADPK-də Müzakirə Olundu

ADPU-nun nəzdində Azərbaycan Dövlət Pedaqoji Kollecində “Mədəniyyətin və Milli Ənənələrin Təbliği” İctimai Birliyinin “Göyçə aşıq sənəti ənənələri” adlı layihəsi çərçivəsində tədbir keçirilmişdir.
Tədbirdə Aşıq Ələsgərin nəticəsi Xətai Ələsgər də iştirak etmişdir. Görüş diskussiya şəklində davam etmiş, aşıq sənətinin ənənələri və bu irsin gənclərə ötürülməsi kimi mövzular ətrafında fikir mübadiləsi aparılmışdır.