“Bir” tələbə-könüllü proqramı Azərbaycan Respublikası Təhsil Nazirliyinin təşəbbüsü ilə 14 dekabr 2015-ci ildə yaradılıb. Proqramın əsas məqsədi ölkəmizin sosial-iqtisadi inkişafında fəal iştirak edən tələbə könüllülərlə işi sistemləşdirmək, könüllülük mədəniyyətini yaymaq və tələbələrin dərsdənkənar vaxtlarını mənalı və faydalı fəaliyyətlərlə dəyərləndirməkdir.

Bu proqram həm ali, həm də orta ixtisas təhsili müəssisələrini əhatə edən genişmiqyaslı bir platformadır. Hazırda Bakı, Sumqayıt, Gəncə, Şəki, Mingəçevir, Lənkəran, Masallı, Quba, Şamaxı, Göyçay, Ağdam kimi şəhərlərdə yerləşən 26 ali və 18 orta ixtisas təhsili müəssisəsində fəaliyyət göstərən “Bir” tələbə-könüllü proqramı, 23.000-dən artıq tələbə-könüllünü bir araya gətirir. Proqram yalnız bakalavr, magistratura və orta ixtisas səviyyəsində təhsil alan tələbələri əhatə edir. “Bir” tələbə-könüllü proqramı aşağıdakı əsas istiqamətlər üzrə fəaliyyət göstərir: • Öyrən – fərdi və peşəkar inkişaf üçün təlimlər, seminarlar;

• Öyrət – digər gənclərə dəstək və təcrübə paylaşımı;

• Yaşa – sosial aktivlik və cəmiyyətə fayda vermək;

• Yaşat – humanitar layihələr və sosial dəstək təşəbbüsləri;

• Kəşf et – yeni bacarıqlar və imkanlarla tanışlıq;

• Zövq al – mədəni və əyləncəli tədbirlərdə iştirak. Bu istiqamətlər tələbələrin təhsil həyatına rəng qatmaqla yanaşı, onların sosial məsuliyyət hissini artırır, komandada işləmək və liderlik bacarıqlarını inkişaf etdirir. Hər bir tələbə öz maraqlarına uyğun istiqamətdə qeydiyyatdan keçərək, aktiv şəkildə fəaliyyətlərə qoşula bilər. 2019-cu ildən etibarən proqram fəaliyyətini “Bir Könüllü” Tələbələrin-Əməkdaşlığı İctimai Birliyi kimi davam etdirir. Bu təşkilat könüllülük və əməkdaşlıq prinsipləri əsasında bir araya gəlmiş tələbələri birləşdirir. Hazırda proqram üzrə koordinator Zeynəb Bağırovadır. “Bir Könüllü” Tələbələrin-Əməkdaşlığı İctimai Birliyinin əsas məqsədləri:

• Gənclər arasında könüllülük fəaliyyətini təşviq etmək;

• Tələbələrin bilik və bacarıqlarının artırılmasına dəstək olmaq;

• Təhsilin və elmin inkişafına yönəlmiş təşəbbüsləri dəstəkləmək;

• Xarici ölkələrin müsbət təcrübələrini öyrənmək və tətbiq etmək. 2021-2022-ci tədris ilində proqram 26 ali, 18 orta, 10 peşə təhsil müəssisəsini əhatə edib. 27000-dən çox üzvə sahib olan proqram il ərzində 260-dan çox tədbir təşkil edib və ümumilikdə 42866 könüllü fəaliyyət saatı qeydə alınıb. 2021-2022-ci tədris ilində proqram Qarabağ bölgəsində (Şuşa, Ağdam) tədbirlərin təşkilinə və sözügedən regionun yenidən bərpasına dəstək məqsədi ilə 100-ə yaxın tələbə-könüllünü fəaliyyətə cəlb edib.

Bu gün proqram, təkcə sosial layihələrdə iştirakla kifayətlənmir, eyni zamanda tələbələrin gələcək peşə və ictimai həyatda uğur qazanması üçün möhkəm təməl yaradır.