Pedaqogika müəllimləri müxtəlif ixtisas qruplarında xüsusi mövzu dərsləri keçiriblər

ADPU-nun nəzdində Azərbaycan Dövlət Pedaqoji Kollecinin Pedaqogika-psixologiya fənn birləşmə komissiyasının təşkilatçılığı ilə FBK-nın fəaliyyət planı çərçivəsində pedaqogika müəllimləri tərəfindən 12–28 noyabr tarixlərində "Pedaqogika" fənninin tədris olunduğu İT, MQT, AET və FTM ixtisaslarının müxtəlif qruplarında “Tərbiyənin tərkib hissələri” mövzusunda iqlim dəyişikliyinə, "Konstitusiya və Suverenlik İli"nə həsr olunmuş xüsusi dərslər keçirilmişdir.
Qrupdaxili müzakirə şəklində təşkil olunan dərslərin keçirilməsində məqsəd tələbələrdə Konstitusiyanın mahiyyəti, suverenlik anlayışı, vətəndaş hüquqları haqqında sərbəst tədqiqatçılıq bacarığını təkmilləşdirmək, hüquqlarını bilən sağlam vətəndaş mövqeyi formalaşdırmaq, ekoloji məsuliyyət hissi aşılamaq, eləcə də tənqidi və yaradıcı düşüncəni inkişaf etdirmək olmuşdur.

Kollecin əməkdaşları Lənkəran–Masallı bölgəsinə maarifləndirici səfər ediblər

ADPU-nun nəzdində Azərbaycan Dövlət Pedaqoji Kollecinin bir qrup əməkdaşı Lənkəran–Masallı bölgəsinə səfər edib.
İşçilərin emosional rifahı və motivasiyasını artırmaq məqsədilə təşkil olunan səfər çərçivəsində interaktiv görüş də keçirilib. Kollecin Sosial məsələlər və ictimaiyyətlə əlaqələr üzrə direktor müavini Sevda Axundova və psixoloq Gülsüm Bayramın təşkilatçılığı ilə baş tutan görüşdə əməkdaşlar bir neçə qrupa bölünərək BMT-nin Dayanıqlı İnkişaf Məqsədlərinin bəndləri olan "Dəniz ekosisteminin mühafizəsi", "Təmiz su və sanitariya", həmçinin "Zorakılığa yox deyək!", "İnsan hüquqları", “Konstitusiya və Suverenlik İli”, ilə bağlı bukletlər hazırlayıb, yekunda öz yanaşmalarını digər iştirakçılarla bölüşüblər.

Sosial iş ixtisası tələbələri Bakının tarixi və müasir məkanlarına gəzinti ediblər

ADPU-nun nəzdində Azərbaycan Dövlət Pedaqoji Kollecinin Xarici dillər FBK müəllimlərinin təşkilatçılığı ilə Sosial iş ixtisasının tələbələri İçərişəhər, Şirvanşahlar Sarayı, Mərkəzi Park, Miniatür Kitab Evi və Filarmoniya bağında gəzintidə olublar.
Tələbələr həm şəhərin qədim tarixi irsi, həm də müasir mədəni mühiti ilə tanış olaraq maraqlı vaxt keçiriblər. Bu gəzinti onların Bakının tarixini və müasir simasını daha yaxşı qavraması, dünyagörüşünün genişlənməsi, şəhər mədəniyyətinə marağın artması baxımından əhəmiyyətli olub.

Fiziki tərbiyə ixtisası tələbələri Hərbi Qənimətlər Parkını ziyarət ediblər

ADPU-nun nəzdində Azərbaycan Dövlət Pedaqoji Kollecinin İncəsənət və fiziki tərbiyə FBK müəllimlərinin təşkilatçılığı ilə Fiziki tərbiyə müəllimliyi ixtisasının tələbələri Hərbi Qənimətlər Parkında olublar.
Ekskursiyanın məqsədi onlarda Vətənə sevgi, düşmənə nifrət hisslərini gücləndirmək olub. Tələbələr parkda nümayiş etdirilən eksponatlarla tanış olaraq ölkəmizin möhtəşəm qələbəsi barədə daha dolğun təsəvvür əldə ediblər.

“English Skills Development Club”ın növbəti məşğələsi keçirilib

ADPU-nun nəzdində Azərbaycan Dövlət Pedaqoji Kollecinin Yasamal və Sabunçu korpuslarında Xarici dillər FBK-nın təşkilatçılığı ilə fəaliyyət göstərən "English Skills Development Club" çərçivəsində növbəti məşğələ keçirilib.

Bu dəfə tələbələr podkast və qısa videolar əsasında mətni anlama, əsas ideyaları seçmə və məzmunla bağlı suallara cavab vermə kimi tapşırıqları yerinə yetiriblər. Dinləmə mərhələsindən sonra təşkil olunan müzakirədə onlar cüt və qrup işlərində fikirlərini sərbəst ifadə edərək danışıq bacarıqlarını təkmilləşdiriblər.

Görüş interaktiv və öyrədici mühitdə keçib, tələbələrin ingilis dilində dinləyib-anlama və danışıq bacarıqlarının möhkəmlənməsinə töhfə verib.

İngilis dilində daha inamlı danışmaq və real ünsiyyət situasiyalarında özünüzü sınamaq istəyirsinizsə, növbəti "English Skills Development Club" görüşünü qaçırmayın!

İnkişaf edin, iştirak edin və yeni imkanlar qazanın!