ADPU-nun nəzdində Azərbaycan Dövlət Pedaqoji Kollecinin direktoru İsrayıl İsgəndərovun təbriki:

"Bütün Azərbaycan qadınları o, cümlədən Kollecimizin hörmətli qadın əməkdaşları və tələbələri, Sizi Beynəlxalq Qadınlar Günü münasibətilə ürəkdən təbrik edir, hər birinizə cansağlığı, səadət və müvəffəqiyyətlər arzulayıram.

Azərbaycan qadını dərin mənəviyyatlı, daim gözəlliyin və zərifliyin mücəssəməsi, sədaqətin və ülviliyin rəmzi rolunda çıxış etmiş, keçmişimizin mürəkkəb sosial-siyasi dəyişikliklərə məruz qaldığı müəyyən dövrlərdə təmkinlilik nümayiş etdirərək cəmiyyətin sarsılmaz mənəvi dayağı olduğunu sübuta yetirmişir. Məmnuniyyət hissi ilə qeyd etmək istəyirəm ki, müstəqil Azərbaycanın qazandığı bütün böyük uğurlarda qadınların misilsiz xidmətləri vardır. 44 günlük müharibədə Zəfərin əldə olunmasında göstərilən qəhrəmanlıq, cəsarətlilik, qorxmazlıq Azərbaycan qadınının gənc nəsli vətənpərvərlik ruhunda tərbiyə etdiyinin, onları xalqa, cəmiyyətə layiqli övlad kimi formalaşdırmasının başlıca göstəricisi kimi təsdiqləndi. Müharibənin yeganə qadın şəhidi Arəstə Baxışova cəsarətin, əzmin və vətənə sədaqətin ən gözəl təcəssümüdür. Hazırdada Azərbaycan xanımları maarifpərvər sələflərinin ənənələrini şərəf və ehtiramla davam etdirir, müasirləşmə yolunda çoxsaylı müvəffəqiyyətlər qazanır və ölkənin inkişafına, quruculuq və yaradıcılıq işlərində ön sıralarda dururlar.
Əminəm ki, bütün Azərbaycan xanımları, ana və bacılarımız bundan sonra da Vətənə, xalqa, dövlətə sədaqət nümayiş etdirəcəklər.

Dəyərli qadınlarımız sizin inkişafınız, təhsilə olan dəstəyiniz Azərbaycan tarixinin inkişafı və dəyəridir. Hər birinizə sağlam, dəyərli və uğurlu karyera arzulayıram!"