ADPU-nun nəzdində Azərbaycan Dövlət Pedaqoji Kollecinin Riyaziyyat-informatika fənn birləşmə komissiyasının təşkilatçılığı, kollecin “Rəqəmsal Bacarıqlar Klubu”nun təşəbbüsü ilə tələbələr üçün “Rəqəmsal etika və sosial media davranışı” mövzusunda maarifləndirici görüş keçirilib.
Görüşün məqsədi tələbələrdə rəqəmsal mühitdə etik davranış qaydaları barədə məlumatlılığı artırmaq və sosial mediadan məsuliyyətli istifadə mədəniyyətini formalaşdırmaq olub. Tədbirdə rəqəmsal vətəndaşlıq, onlayn ünsiyyət etikası və informasiya paylaşımında məsuliyyət məsələləri müzakirə olunub.
Müzakirələr zamanı real həyat nümunələri əsasında sosial mediada məlumatın yoxlanılmadan paylaşılmasının yarada biləcəyi risklər və bunun həm fərdlər, həm də cəmiyyət üçün mümkün nəticələri tələbələrin diqqətinə çatdırılıb.
Tədbir iştirakçıların mövzuya böyük maraq göstərməsi və aktiv müzakirələri ilə yadda qalıb. Bu cür görüşlər gənclərin rəqəmsal savadlılığının və məsuliyyətli sosial media davranışının formalaşmasında mühüm rol oynayır.