ADPU-nun nəzdində ADPK-nın “Xarici dillər” FBK-nın rus dili müəllimi Daşdəmirova Xatirə Qabil qızı MQT25/02SBr qrupunun tələbələri ilə birlikdə Azərbaycan xalqının igid oğlu, qəhrəman kəşfiyyatçı Mehdi Hüseynzadənin abidəsini ziyarət ediblər.
Ziyarətdən əvvəl “Azərbaycanın II Dünya müharibəsində rolu” mövzusunda dərs təşkil olunub. Dərs zamanı tələbələr II Dünya müharibəsində Azərbaycan xalqının göstərdiyi qəhrəmanlıq, neft sənayesinin cəbhəyə verdiyi dəstək və azərbaycanlı döyüşçülərin tarixi xidmətləri barədə maraqlı təqdimatlarla çıxış edib, mövzu ətrafında geniş müzakirələr aparıblar.
Keçirilən dərsin və təşkil olunan ziyarətin əsas məqsədi tələbələrdə vətənpərvərlik hissinin gücləndirilməsi, tarixi yaddaşın qorunması, milli qəhrəmanlarımızın tanıdılması və gənclərin Azərbaycan tarixini daha dərindən öyrənməyə marağının artırılması olub.
Tələbələr ziyarət zamanı Mehdi Hüseynzadənin şərəfli həyat yolu və göstərdiyi qəhrəmanlıqlar haqqında ətraflı məlumat əldə ediblər.