"Konstitusiya və Suverenlik İli” və İnsan Hüquqlarının qorunması aylığı çərçivəsində 29 dekabr 2025-ci il tarixində ADPU-nun nəzdində Azərbaycan Dövlət Pedaqoji Kollecində Azərbaycan Respublikasının İnsan Hüquqları üzrə Müvəkkili (Ombudsman) Səbinə Əliyeva ilə maarifləndirici görüş keçirilmişdir.
Tədbir Dövlət Himninin səsləndirilməsi ilə başlamış, şəhidlərin xatirəsi bir dəqiqəlik sükutla yad edilmişdir.
Açılış nitqi ilə çıxış edən ADPU-nun rektoru professor Cəfər Cəfərov qonaqları salamlamış, bütün iştirakçıları qarşıdan gələn Dünya Azərbaycanlılarının Həmrəyliyi Günü və Yeni il münasibətilə təbrik etmişdir.
Daha sonra söz Ombudsman Səbinə Əliyevaya verilmişdir. Səbinə Əliyeva Azərbaycan Respublikasının Konstitusiyasının müstəqil dövlətçilik tariximizdəki rolu, insan hüquqlarının qorunmasının dövlət siyasətinin prioritet istiqamətlərindən biri olması, cəmiyyətdə hüquqi şüurun formalaşdırılması baxımından “Konstitusiya və Suverenlik İli”nin əhəmiyyəti barədə geniş məruzə etmişdir.
ADPU-nun nəzdində Azərbaycan Dövlət Pedaqoji Kollecinin direktoru Amalya Sezgin dəvəti qəbul edib tədbirdə iştirak etdiyinə görə Ombudsmana və digər dəvət olunmuş qonaqlara dərin təşəkkürünü bildirmiş, orta ixtisas təhsili müəssisələri arasında bu görüşün məhz ilk olaraq ADPK-da keçirildiyini xüsusi vurğulamışdır.
Sonda S.Əliyeva tələbələrin insan hüquq və azadlıqları ilə bağlı çoxsaylı suallarını cavablandırmışdır.
Tələbələrin ifasında səsləndirilən şeir və mahnılar tədbirə xüsusi rəng qatmışdır.
Görüşdə Ombudsman Aparatının nümayəndələri, YAP Yasamal Rayon Təşkilatının sədri Bəxtiyar Nəbiyev, Elm və Təhsil İşçiləri Həmkarlar İttifaqının Yasamal Rayon Komitəsinin sədri Rövşən İbrahimli də iştirak etmişlər.